مع توسع مشروع مترو الرياض صار كثير من الناس يدورون أماكن قريبة من المحطات يقضون فيها وقت قبل المشوار أو بعده. والمسار الأزرق بالذات يمر على مناطق حيوية مليانة خيارات، من كافيهات صغيرة وهادية، إلى مقاهي ترند تقدم قهوة مختصة وحلا يفتح النفس. الفكرة إنك تخلص مشوارك وتلقى مكان قريب ترتاح فيه، تشرب قهوة مظبوطة وتستمتع بجلسة حلوة بدون ما تتعب بالبحث عن مواقف أو تمشي مسافات طويلة.
في هالمقال جمعنا لكم أفضل 8 كافيهات قريبة من المسار الأزرق، بناءً على تجارب الزوار وأجواء الأماكن وجودة القهوة والحلى. حاولنا نركز على الخيارات اللي فعلاً تعطي تجربة متكاملة: قهوة مضبوط، مكان مريح، وأسعار مناسبة. واللي يميز هالقائمة إنها متنوعة، تلاقي فيها الكافيه العصري اللي يناسب الشباب، والمكان الهادئ اللي تفضله للعوائل أو للقراءة والدراسة.
خلك معنا للنهاية، يمكن تكتشف كوفي جديد يصير وجهتك الدائمة كل ما مريت على المسار الأزرق.
محمصة سيكا – محطة حي الملك فهد 2
المكان مرتب ورايق، والجو العام يعطيك إحساس بالراحة من أول ما تدخل. اللي عجبني إن عندهم أنواع متعددة من البن وتقدر تشم الروائح قبل ما تختار، وهذا بحد ذاته يخليك متحمس لتجربة القهوة. جربت عندهم الفلات وايت بحليب اللوز وكان موزون ولذيذ، وبعدها جربت مشروبهم الجديد “آيس كوفي بالخوخ”، الصراحة النكهة فاجأتني، مزيج منعش بين القهوة ونكهة الخوخ، أحسه مثالي لأجواء الصيف.
الحلى بعد ما يطيح من يدك، خصوصًا التراميسو اللي فعلاً يذوب في الفم بنكهة موزونة، والكوكيز بعد لذيذة وخفيفة ما فيها طعم بيض مزعج مثل بعض الأماكن. حتى التشيزكيك عندهم يستاهل التجربة. لاحظت إن الموظفين بشوشين وسريعين بالخدمة، وهذا فرق معي كثير وزاد من متعة الجلسة. فيه تفاصيل صغيرة مثل طريقة تقديم المشروبات والحلى تبين لك إن المكان يهتم بالعميل وبالتجربة ككل.
الموقع قريب من محطة مترو حي الملك فهد، وهذا ميزة كبيرة لأن الوصول له سهل حتى لو بدون سيارة. صحيح إن المكان مو كبير مرة، لكن مرتب وأنيق، والجلسات تعطي إحساس بالهدوء أكثر وقت النهار. بالليل ممكن يكون فيه زحمة، بس يظل المكان يستاهل الزيارة خصوصًا لعشاق القهوة المختصة. بالنسبة لي صرت أحطه من الأماكن اللي أرجع لها كل فترة، سواء عشان قهوتهم المميزة أو الأجواء الهادية اللي يقدمونها.
أوكاوا – محطة حي الملك فهد 2
زرت أوكاوا كافيه على طريق الملك فهد، قريب من محطة المترو، وكنت متحمس أجرّب البانكيك الياباني اللي مشهورين فيه. من أول ما وصل الطلب عرفت إن التجربة غير، البانكيك يجي قطني وخفيف كأنه مارشميلو، جربت فوجي بانكيك وكان فعلاً يستاهل التجربة. المكان له جو ياباني مرتب، تحس كأنك بوسط كافيه بطوكيو.
القهوة عندهم من خطوة جمل، جربت الفلات وايت وكان مضبوط، لكن اللي لفت انتباهي أكثر هو الماتشا. جربت ماتشا الغروب وماتشا الفراولة، النكهة متوازنة وما فيها مرارة زايدة مثل بعض الأماكن، فعلاً تميزوا فيه. الحلى مع الماتشا أعطى توازن حلو للتجربة.
الزحمة موجودة خصوصًا بالليل، والطلبات ممكن تتأخر شوي، بس الموظفين متعاونين وبشوشين. الأسعار فوق المتوسط، لكن بالنسبة لي البانكيك والماتشا غطوا على هالنقطة. بشكل عام، أوكاوا مكان يستاهل الزيارة إذا ودك تغير جو وتعيش تجربة يابانية مختلفة بالرياض.
مقهى السبعينات – محطة مكتبة الملك فهد
تجربتي بمقهى السبعينات في العليا كانت مختلفة. أول ما تدخل تحس كأنك رجعت بالزمن، من الديكور البسيط إلى القطع التراثية اللي موزعة بكل زاوية. الجلسات واسعة ومريحة، والمكان مرتب ونظيف، حتى طريقة التقديم فيها لمسة قديمة تلامس القلب. أكثر شي جذبني إن الأجواء فيها عفوية ودفا يذكرك بأيام الطيبين.
جربت القهوة العربية مع تمر مجروش، بصراحة الطعم ممتاز ويكمل الجو التراثي اللي عايشه بالمكان. وطلبت شاي كرك، وكان موزون ويعدل المزاج مثل ما تعودنا. المنيو مو كثير مرة، لكن الموجود يكفي للتجربة خصوصًا إذا جاي تستمتع بالجلسة أكثر من الأكل. الحلى عندهم بسيط بس مرتب، وكيكة التمر كانت من الأشياء اللي تستاهل التجربة.
الخدمة بشكل عام جيدة والموظفين بشوشين ومتعاونين، صحيح أحيانًا تحس إن فيه تأخير أو نقص ببعض الأصناف، لكن أجواء المكان تغطي على هالنقطة. لو معك أحد كبير بالعمر بيكون المكان له معنى خاص، وللسياح يعتبر كأنه متحف صغير عن أجواء السعودية زمان. باختصار، مقهى السبعينات مكان هادي ورايق ويستاهل تكرار الزيارة.
تشيريه كافيه – محطة بنك البلاد
زرت تشيريه كافيه في العليا ولفتني من أول لحظة تصميم المكان، مرتب وصغير بس مليان تفاصيل تعطي راحة وهدوء. الجلسات محدودة لكن فيها إطلالة على فندق نارسيس تعطي لمسة مميزة، والمكان قريب من المترو فهذا يسهل الوصول له حتى وقت الزحمة. الجو العام عصري ومرتب، والموظفين تعاملهم لبق ويستاهلون الشكر.
جربت القهوة عندهم وكانت مضبوطة، خصوصًا الـ V60 والكورتادو. فيه لمسة اهتمام بطريقة التقديم، والنكهات واضحة وموزونة. الحلى متنوع، لكن اللي يستاهل التجربة فعلاً هو التيراميسو والفرنش توست بالنوتيلا، لذيذ وخفيف ويكفي شخصين. الأسعار تميل للارتفاع شوي، بس بالنسبة لي الطعم والأجواء عوضت هالشي.
الخدمة متفاوتة مرات تكون سريعة ومرات يتأخرون خصوصًا مع الزحمة، وبرضو ما فيه حمامات داخل الكافي، وهذا ممكن يضايق البعض. لكن بشكل عام التجربة كانت جميلة، المكان مرتب ونظيف، والموظفين بشوشين، وصار من الكافيهات اللي حاطها بخياري إذا جيت العليا.
كلتورا – محطة المركز المالي
من الأماكن اللي تحسسك بالتميز من أول ما تدخل. القهوة عندهم لها طابع خاص، خصوصًا الآيس كلتورا لاتيه اللي يعتبر مشروبهم الأشهر، نكهته موزونة وحلاوته معتدلة وتقدر تطلبه بسويت أقل. جربت معه الماتشا وكانت جيدة، لكن اللي فاز عندي هو الحلا، خصوصًا الميلتنق بوت والتشيزكيك، نكهات غنية وتكمل القهوة بشكل رائع.
المكان نفسه صغير ومزحوم أغلب الوقت، خاصة بالويكند، ومع ذلك التنظيم ماشي بسرعة والستاف بشوشين ويستاهلون الشكر. جربت أكثر من ساندوتش عندهم مثل البوراتا والتونة، وخبز الكرواسون اللي يستخدمونه هش وخفيف ويعطي التجربة طابع مميز. حتى مع الأسعار اللي يعتبرها البعض مرتفعة شوي، الطعم والجودة يخلوك تنسى هالنقطة.
الكوفي فعليًا صار ترند في الرياض، واللي يميزه إنه يقدم تجربة مختلفة بين القهوة المتخصصة والحلى المميز والجلسة البسيطة الأنيقة. صحيح المساحة محدودة والمواقف صعبة، لكن إذا رحت بدري أو خذيت تيك أواي بيكون أفضل خيار. بالنسبة لي كلتورا صار من الأماكن اللي أرجع لها كل فترة إذا ودي بفنجان قهوة مضبوط مع لقمة حلى تخليني أطلع راضي.
قيدب – محطة مصرف الإنماء
من الكافيهات اللي قدرت تجمع بين القهوة المضبوطة والحلى المتنوع. القهوة عندهم سواء قهوة اليوم أو الإسبريسو دايم موزونة وطعمها واضح، والسبانش لاتيه من أكثر المشروبات اللي يمدحونها. بالنسبة للحلى، خيارات كثيرة تناسب كل الأذواق؛ من البانكيك الياباني القطني، إلى الفرنش توست اللي يوصفونه كثير من الزبائن إنه من ألذ ما جربوا، غير الكوكيز والسان سبستيان اللي فعلاً يكملون الجلسة.
المكان واسع وفيه جلسات داخلية وخارجية، وأغلب اللي يزورونه يمدحون الجو الهادئ مع إن الكوفي غالبًا يكون مزحوم. الميزة إنه قريب جدًا من محطة مترو مصرف الإنماء، فالوصول له سهل سواء بالسيارة أو المترو. الخدمة بشكل عام سريعة والموظفين تعاملهم راقي وبشوش، وفيه تفاصيل صغيرة مثل الضيافة أحيانًا أو طريقة تقديم المشروبات تبين لك اهتمام المكان بزبائنه.
الأسعار تعتبر مناسبة مقارنة بالجودة والموقع، وميزة إضافية عند كثير من الناس إنه ما فيه موسيقى، وهذا خلاه خيار مفضل للعوائل واللي يحبون جلسة رايقة. صحيح فيه ملاحظات بسيطة مثل صغر المساحة أو بعض التأخير وقت الزحمة، لكن التجربة ككل تخلي قيدب من الكافيهات اللي ترسخ بالذاكرة وتستحق تكرار الزيارة.
مطل الديرة – محطة البطحاء
مكان هادئ وجميل بجلساته الواسعة وإطلالته المميزة على وسط الرياض. الأجواء فيه رايقة وتناسب العوائل والأفراد، سواء اخترت الجلسات الداخلية أو الخارجية اللي مزودة برذاذ مائي وشبة نار بالشتاء. تفاصيل المكان تبين اهتمام بالنظافة والترتيب، والأسعار معقولة مقارنة بالموقع والخدمة.
المنيو متنوع ويجمع بين الفطاير والبيتزا والفطور السعودي والمشروبات الساخنة والباردة. كثير يمدحون الشاي عندهم بكل أنواعه، خصوصًا شاي البخار وشاي الحبق مع خلية النحل القطنية، غير العصيرات الطازجة والكيك اللي يجذب عشاق الحلى. الأكل طازج وطعمه يفتح النفس، سواء فطور أو وجبات خفيفة.
الطاقم بشوش وخدمتهم سريعة حتى وقت الزحمة، وهذا يعطي راحة في الجلسة. صحيح المواقف محدودة ومكانه مو واضح للوهلة الأولى، لكن اللي يجربه يكتشف إنه يستاهل الزيارة وأكثر. بدون موسيقى وأجواء عائلية مريحة، مطل الديرة صار وجهة مميزة للفطور أو القهوة مع إطلالة تعكس هدوء الديرة وروحها.
هاتن كافيه – محطة العزيزية
الكوفي يتميز بأجواء رايقة ومكان شرح بجلسات متنوعة داخلية وخارجية وحتى قسم خاص للعوائل. تفاصيل المكان تبين اهتمام بالديكور والراحة، والموظفين أغلبهم بشوشين وتعاملهم راقي وسريع. مميزين بالتنظيم وطريقة الطلب عبر الباركود اللي تسهّل التجربة وتخليك تركز على جلستك بدون إزعاج.
القهوة عندهم موزونة وطعمها واضح ومتنوعة ما بين قهوة اليوم، V60، الإسبريسو والسبانش لاتيه. فيه ملاحظات بسيطة على بعض المشروبات اللي تحتاج تحسين مثل الفلات وايت، لكن بالمجمل القهوة تضبط المزاج وتكمل مع خيارات الحلا. الفرنش توست تحديدًا صاير أيقونة عندهم، غير الكيكة البودينق، كيكة العسل، وكيكة الجزر اللي وصفوها الزوار إنها موزونة وخفيفة.
الحلى والمخبوزات بشكل عام متنوع وموزون من الكروسان والوافل إلى الكيكات الموسمية، وحتى الآيسكريم اللي نال إعجاب كثير. صحيح فيه ملاحظات على الأكواب الورقية أو بعض التأخير أحيانًا وقت الزحمة، لكن هالأشياء ما تغطي على التجربة الكاملة. المكان فعليًا صار وجهة محببة للجمعات أو الدراسة والهدوء، ويستحق يتكرر زيارته.
وبعد ما عرفنا أفضل الكافيهات القريبة من المسار الأزرق، صار الموضوع أسهل عليك تختار المكان اللي يناسبك سواء لجلسة سريعة قبل المشوار أو قهوة هادية بعد يوم طويل. جرّب واحد من هالأماكن وشاركنا رأيك، ويمكن تكتشف مكانك المفضل الجديد. وإذا عندك كوفي ثاني يستاهل يضاف للقائمة، اترك تعليقك وخله يوصل لغيرك.